Қадамҳои амалӣ дар самти рақамикунонии соҳаи почта ва савдои электронӣ
7 май дар бинои Корхонаи воҳиди давлатии «Почтаи Тоҷикистон» машварати кории муштарак бо иштироки намояндагони масъули Вазорати нақлиёт, Хадамоти гумрук ва Агентии авиатсияи граждании назди Ҳукумати Ҷумҳурии Тоҷикистон баргузор гардид. Ин нишаст дар доираи иҷрои бандҳои 48 ва 49-и Нақшаи амали «Барномаи савдои электронӣ дар Ҷумҳурии Тоҷикистон барои солҳои 2025-2029» доир шуда, ҳадафи асосии он таҳияи механизмҳои самараноки ҳамоҳангсозӣ дар соҳаи тиҷорати рақамӣ буд.Дар рафти машварат ба иштирокчиён рӯнамои (презентация) муфассал оид ба ворид намудани системаи муосири ORE plus, ки лоиҳаи Иттиҳоди почтаи байналмилалӣ мебошад, намоиш дода шуд. Таъкид гардид, ки ҷорисозии ин система дар фаъолияти «Почтаи Тоҷикистон» имкон медиҳад, ки равандҳои логистикӣ ва почтавӣ пурра автоматикунонӣ шуда, заминаи техникии савдои электронӣ дар кишвар тақвият ёбад. Ҳамзамон, намояндагони Хадамоти гумрук лоиҳаи ҷойгиркунии ширкатҳои маркетплейс ва сохтани феҳристи ягонаи онҳоро муаррифӣ намуданд, ки ин иқдом барои шаффофияти амалиёти тиҷоратӣ ва танзими дурусти гумрукии молҳо зарур мебошад.Дар анҷоми вохӯрӣ миёни намояндагони вазорату идораҳо саволу ҷавоби судманд сурат гирифта, иштирокчиён оид ба ҳамоҳангсозии минбаъдаи платформаҳои мавҷуда ва ҳалли масъалаҳои соҳавӣ табодули афкор намуданд. Натиҷаҳои ин машварат ба эҷоди низоми воҳид ва муосири савдои электронӣ дар кишвар мусоидат хоҳад кард.
Табрикоти Директори генералии КВД «Почтаи Тоҷикистон» бахшида ба Рӯзи телевизион, радио ва кормандони соҳаи алоқа
Ҳамкасбони азиз ва кормандони соҳаи алоқа! Шуморо ба муносибати Иди касбӣ – Рӯзи телевизион, радио ва кормандони соҳаи алоқа самимона табрик мегӯям. Имрӯз соҳаи алоқа ва технологияҳои муосир асоси пешрафти ҷомеа ва омили калидии рушди иқтисоди рақамиро ташкил медиҳанд. Боиси ифтихор аст, ки таҳти сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи алоқа ба марҳалаи нави тараққиёт ворид гардид. Таваҷҷуҳи хоссаи Пешвои муаззами миллат ба соҳа, аз ҷумла эълон гардидани солҳои 2025–2030 ҳамчун “Солҳои рушди иқтисоди рақамӣ ва инноватсия” ва қабули “Стратегияи рушди соҳаи алоқа то соли 2040”, заминаи мусоидеро барои рақамикунонии комили кишвар ва беҳтар шудани сатҳи зиндагии кормандони бахши телекоммуникатсия фароҳам овард. Дар ин давраи таърихӣ, ки мо ба истиқболи 35-солагии Истиқлолияти давлатӣ омодагӣ мебинем, заҳмати содиқонаи шумо ҷиҳати ободии Ватани маҳбубамон ниҳоят арзишманд аст. Ба ҳамаи шумо дар ин ҷодаи пурмасъулият саломатии бардавом, саодати рӯзгор ва дар роҳи расидан ба ҳадафҳои созандаи давлату миллат муваффақиятҳои беназир таманно дорам. Иди касбӣ муборак!
ТАБРИКОТИ САРДОРИ ХАДАМОТИ АЛОҚАИ НАЗДИ ҲУКУМАТИ ҶУМҲУРИИ ТОҶИКИСТОН ИСФАНДИЁРИ САЪДУЛЛО БА ИФТИХОРИ РЎЗИ ТЕЛЕВИЗИОН, РАДИО ВА КОРМАНДОНИ СОҲАИ АЛОҚА
Муҳтарам кормандони соҳаҳои алоқа, Ҳамкасбон ва ҳамкорони гиромӣ! Бо эҳтиром ва эҳсоси баланди ифтихор Шуморо ба муносибати Иди касбӣ – Рӯзи телевизион, радио ва кормандони соҳаи алоқа самимона табрик намуда, бароятон барори кору рӯзгор, татбиқи нақшаҳои ояндасоз ва саодату сарбаландиро таманно мекунам. Имрӯзҳо алоқа ва соҳаҳои ба он марбут, унсури асосии зиндагӣ ва кору фаъолияти ҳар нафарро ташкил дода, ҳамчун васоити таҳвилу қабули мухобирот, таъмини иттиллоту маърифат, густариши фазои ягонаи иттилоотии мамлакат ва пеш аз ҳама муттаҳид ва пайвандсозии инсонҳо табдил ёфта, ҳамун омили рушди иқтисоди рақамӣ, арзёбӣ мегардад. Аз ин ҷост, ки давлату Ҳукумати мамлакат ва пеш аз ҳама Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди босуръати соҳаи алоқа таваҷҷӯҳи махсус зоҳир намуда, баҳри дастрасии озоду бемайлони аҳолӣ ба хизматрасониҳои муосири телекоммуникатсионӣ, тадбирҳои муассирро роҳандозиву амалӣ менамояд. Бо ташаббусу ибтикори бевоситаи Пешвои миллат муҳтарам Эмомалӣ Раҳмон эълон гардидани солҳои 2025 – 2030 ҳамчун “Солҳои рушди иқтисоди рақамӣ ва инноватсия”, қабули “Стратегияи рушди соҳаи алоқаи Ҷумҳурии Тоҷикистон барои давраи то соли 2040” ва ба имзо расидани Фармони Президенти Ҷумҳурии Тоҷикистон «Дар бораи танзими музди меҳнат ва пардохти иловапулӣ ба музди меҳнати кормандони соҳаи технологияҳои иттилоотию коммуникатсионӣ» исботи ин гуфтаҳо буда, дар рушди бемайлони соҳаи алоқа, рақамикунонии раванди корҳо ва ҳифзи иҷтимоии кормандони бахши телекоммуникатсонӣ бесобиқа мебошанд. Боиси қайди махсус аст, ки татбиқи амалии ташаббусу ибтикороти мазкур ба сатҳу сифати хизматрасониҳо, беҳсозии шароити кору фаъолият ва баланд бардоштани вазъи иҷтимоии кормандони соҳа таъсири мусбату назаррас расонида, дилро ба кор гарм ва садоқату самимиятро дар иҷрои вазифаҳои хидматӣ афзун мегардонад. Ҳамкасбони азиз! Таҷлили имсолаи Рӯзи телевизион, радио ва кормандони соҳаи алоқа ба «Соли вусъат додани корҳои ободонию созандагӣ ва тақвияту таҳкими худшиносию худогоҳии миллӣ», ки ба ифтихори Ҷашни мубораку муқаддаси миллӣ – 35 солагии Истиқлолияти давлатии Ҷумҳурии Тоҷикистон эълон гардидааст, рост омада, моро ба заҳмати тахассусмандонаву содиқона ҷиҳати пиёдасозии равандҳои созанда баҳри пешрафт ва ободии Ватани маҳбубамон – Тоҷикистони азиз, водор месозанд. Боварии комил дорем, ки мову Шумо дар ин ҷода чун ҳарвақта, пешсаф ва комгор хоҳем гардид. Рӯзи телевизион, радио ва кормандони соҳаи алоқаро бори дигар ба ҳамаи Шумо самимона табрик намуда, бароятон саломатии бардавом, рӯзгори ободу осуда, неруи созанда, илҳоми тоза ва дастовардҳои беш аз пешро таманно мекунам. Ид муборак, ҳамкасбони гиромӣ!
ТАҶЛИЛИ ҶАШНИ НАВРӮЗ ДАР ХАДАМОТИ АЛОҚА
Имрӯз дар Хадамоти алоқаи назди Ҳукумати Ҷумҳурии Тоҷикистон ҷашни байналмилалии Наврӯз бо шукуҳу шаҳомати хоса ва дар фазои идонаи саршор аз шодӣ таҷлил гардид. Дар ин чорабинии бошукуҳ роҳбарият ва кормандони соҳа, инчунин намояндагони зерсохторҳо фаъолона иштирок намуда, анъанаҳои неки ниёгонро бо эҳтироми хоса пос доштанд. Дар доираи ҷашн ҳар як зерсохтори Хадамоти алоқа бо оростани дастурхонҳои ҷашнӣ, намоиши таомҳои миллӣ, шириниҳои гуногун ва ороиши рамзии наврӯзӣ ҳунару завқи баланди худро муаррифӣ намуд. Дастурхонҳо бо унсурҳои хоси фарҳанги миллӣ, аз ҷумла суманак, ҳафтсину ҳафтшин, либосҳои миллӣ ва дигар анъанаҳои қадима зебу зиннат дода шуда, фазои идонаро боз ҳам рангоранг гардонданд. Ҳайати комиссия ба сифати ороиш, гуногунрангии таомҳо, риояи анъанаҳои миллӣ ва тарзи муаррифии ҳар як дастурхон баҳо дода, беҳтаринҳоро муайян намуданд. Дар натиҷа, КВД «Почтаи Тоҷикистон» бо дастурхони ҷолиб, ороиши зебо ва муаррифии шоистаи фарҳанги миллӣ сазовори ҷойи дуюм гардид. Қобили зикр аст, ки чунин чорабиниҳо ба таҳкими рӯҳияи ҳамдигарфаҳмӣ, арҷгузорӣ ба арзишҳои миллӣ ва боло бурдани ҳисси ифтихори ватандорӣ мусоидат менамоянд. Таҷлили Наврӯз дар Хадамоти алоқа бори дигар нишон дод, ки ин ҷашни бостонӣ ҳамчун рамзи дӯстӣ, ҳамдилӣ ва эҳёи анъанаҳои миллӣ миёни кормандон мавқеи хоса дорад.
Ҳамкориҳои Хадамоти алоқа бо ширкати Ceragon Networks тақвият меёбад
Ҳайати роҳбарикунандаи Хадамоти алоқаи назди Ҳукумати Ҷумҳурии Тоҷикистон ва Ҷамъияти саҳомии кушодаи «Тоҷиктелеком» дар доираи сафари корӣ аз дафтари ширкати «Серагон Нетворкс» (Ceragon Networks) — истеҳсолкунандаи технология ва таҷҳизоти муосири соҳаи телекоммуникатсия, ки дар шаҳри Бухарести Руминия воқеъ мебошад, дидан намуданд. Дар ҷараёни боздид мулоқот бо Ноиби президенти ширкат ва роҳбари намояндагиҳо дар Руминия ва Словакия ҷаноби Корнел Ватаманиуч ва коршиносони ширкат сурат гирифт. Зимни мулоқот ҷонибҳо масъалаҳои марбут ба густариши ҳамкорӣ дар самти татбиқи технологияҳои муосири телекоммуникатсионӣ, истифодаи таҷрибаи пешрафта ва мубодилаи донишҳои соҳавиро мавриди баррасӣ қарор доданд. Ҳамзамон, ҳайати Ҷумҳурии Тоҷикистон бо раванди фаъолияти ширкат, имкониятҳои техникии таҷҳизоти муосир ва роҳҳои татбиқи самараноки онҳо дар рушди инфрасохтори телекоммуникатсионӣ аз наздик шинос гардид.
ДИРӮЗУ ИМРӮЗИ ПОЧТАИ ТОҶИК
Агар ба таърихи хидматрасонии почта дар гузашта назар андозем, мебинем, ки дар давраи давлатдории Сомониён шаклгирии почта хусусияти давлатӣ касб кард. Барои анҷоми корҳои муҳими давлатӣ, ба ҳам ҷӯр сохтани робита бо мардум ва ҳамсояҳо “Девон-ул-барид” таъсис дода шуда буд. То ин давра низ мукотиба миёни мардум ба василаҳои гуногун сурат мегирифт. Тавре Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар асари безаволи худ — “Чеҳраи мондагор” ишора кардаанд, ҳанӯз бо фармони Дорюши Бузург 2500 сол пеш аз ин дар ҷаҳон нахустин почта бо номи “Чопар” бо назму тартибу хос таъсис ёфта буд. Нисбат ба номарасонҳо ин нукта шуҳрат дошт: “На гармӣ, на сармо, на барфу борон, чопорро аз рафтан боз намедорад”. Таъсиси Ҷумҳурии автономии Тоҷикистон 9 октябри соли 1924 ба фаъолияти почтаи тоҷик асос гузошт. Тули беш аз як аср Почтаи Тоҷикистон дар хидмати мардум буда, таърихи он пур аз корномаю фидокориҳост. Cоли 1929 Ҷумҳурии сотсиалистии Тоҷикистон таъсис ёфт ва соли 1930 аввалин ташкилоти почта дар шаҳри Сталинобод- Душанбеи ҳозира бо 17 корманд ва 27 шуъбаи ноҳиявӣ ба фаъолият оғоз намуда, минбаъд доираи фаъолияти он густардатар гардид ва рушд ёфт. Ногуфта намонад, ки моҳи октябри соли 1930 дар ҳайати 10 нафар Раёсати алоқаи ҷумҳурӣ созмон ёфт, ки 27 шуъбаи алоқаи ноҳиявиро муттаҳид мекард. То соли 1938 дар шаҳри Душанбе ҳамагӣ 6 адад қуттии почта ба қайд гирифтп шуда буд ва он ба 44 адад расонида шуд. Дар шаҳрҳои Кулоб, Хуҷанд, Истаравшан, ноҳияҳои Вахш, Шаҳритуз ва қисматҳои ғарбӣ-шарқии Тоҷикистон шуъбаҳои почта ифтитоҳ ёфтанд. Хидмати почта дар солҳои мушкили Ҷанги Бузурги Ватанӣ (1941-1945) басо арзанда ва таърихӣ арзёбӣ мегардад. Танҳо дар соли 1942 зиёда аз 5000 бастабандӣ қабул ва ба воситаи қатораи почта ба майдони ҷанг фиристода шуданд. Марҳилаи рушди минбаъдаи почтаи ҷумҳурӣ ба солҳои 1970 то солҳои 1990 рост меояд. Маҳз дар ин давра биноҳои ду-се ошёнаи шуъбаҳои алоқаи замонавӣ сохта, ба истифода дода шуданд. Дар ин давра миқдори шуъбаҳои почта дар ҷумҳури 590 ададро ташкил медод ва соле то 150 тонна муросилоти почта коркард мешуд, ки ин соҳаи даромадноки соҳа ба ҳисоб мерафт. Барҳамхӯрии Иттиҳоди Шуравӣ, канда шудани робитаҳои иқтисодӣ ва маданӣ, нооромиҳои сиёсӣ, ҷанги бародакушии дохилӣ ба инкишофи почта монеа гашт. Зиёда аз 60 фоизи шуъбаҳои алоқаи почта аз кор монданд, мубодилаи почта 200 баробар кам гардид. Дар Иҷлосияи шонздаҳуми Шурои Олӣ ба мақоми Раиси Шурои Олии Ҷумҳурии Тоҷикистон интихоб гардидани муҳтарам Эмомалӣ Раҳмон ба дили мардум гармӣ ва ба кишвари азизамон сулҳи деринтизорро овард. Маҳз баъди ин рӯйдоди таърихӣ барои дар сатҳи нав ва бо диди тоза барои барқарор намудани соҳаи алоқа қадамҳои устувор гузошта шуд. Хисороти ба соҳа расида дар айёми нооромиҳо зина ба зина рафъ гардида, иқтидори пурраи корӣ аз нав барқарор гардид ва сол аз сол он беҳтару хубтар гардида, самтҳои фаъолият густардатар гардид. Қайд кардан ба маврид аст, ки дар соли 2025 ба андозаи 18 миллиону 329 ҳазору 103 сомонӣ ба аҳолӣ хидматарсонӣ сурат гирифтааст, ки ин нишондод 130 фоизи нақшаи солонаро ташкил медиҳад ва нисбат ба соли 2024 4 миллиону 369 азору 447 сомонӣ зиёд мебошад. Ҳаҷми муросилоти содиротӣ ба 9 тоннаю 482 кг баробар гардид, ки нисбат ба ҳамин давраи соли 2024 1 тоннаю 869 кг зиёд аст. Ҳаҷми муросилоти воридотӣ 39 тоннаю 377 кг-ро ташкил медиҳад ва ин нишондод нисбат ба соли 2024 7 тоннаю 180 кг зиёд мебошад. Афзоиши ҳаҷми муросилоти воридотӣ имкон муҳайё месозад, ки ҳангоми ҳисоббаробаркуниҳои байналмилалӣ фоидаи бештаре насиби КВД “Почтаи Тоҷикистон” гардад. Ҳамчунин, дар соли 2025 шуъбаи почтаи фаврӣ 1458 адад муросилотро ба суроғаҳои нишондодашуда ва 1168 адад номаю бастаҳои мизоҷонро ба дигар давлатҳо фиристодааст. Дар соли 2025 миқдори ирсолпулиҳои дохилӣ 9413 адад буда, маблағи умумии он 4423212 сомониро ташкил медиҳад, ки нисбат ба ҳамин давраи соли 2024 626 662 сомонӣ зиёд мебошад. Ба тавсиб расидани Қарори Ҳукумати Ҷумҳурии Тоҷикистон “Дар бораи корхонаҳо ва муассисаҳои низоми Хадамоти алоқаи назди Ҳукумати Ҷумҳурии Тоҷикистон” №481 аз 25 сентябри соли 2025 имкониятҳои дигари даромаднокии почтаро муҳайё сохт. Дар заминаи КВД “Почтаи тоҷик”, КВД “Алоқаи махсус” ва КВД “Маркази марка” Корхонаи воҳиди давлатии “Почтаи Тоҷикистон” таъсис дода шуд. Ҳамаи ҷанбаҳои ташкилию ҳуқуқӣ, сохторӣ, фаъолияти молиявию хоҷагидорӣ, низоми коргузорӣ ба анҷом расонида шуд. Танҳо дар давоми семоҳаи охири соли 2025 аз ҳисоби марка, 240 535 ва аз ҳисоби лиффофаҳо 62248 сомонӣ даромади соф ба даст омад. Маблағи умумии даромад аз нишонаҳои почта 320 783 сомониро ташкил медиҳад. Тавре дар “Стратегияи амали почта дар шароити кунунӣ”, ки Иттифоқи умумҷаҳонии почта (ВПС) нишон додааст, рушди тиҷорати электронӣ аз вазифаҳои асосии почта барои рақобатпазирӣ муайян гардидааст. Хушбахтона, дар соли 2025 бо дастгирии бевоситаи роҳбарияти Хадамоти алоқа КВД “Почтаи Тоҷикистон” имкон пайдо намуд, ки ба ин бозор ворид гардад. Маблағи умумии даромадҳои соф аз ин хидматрасониҳо дар семоҳаи чоруми соли 2025 44104 сомониро ташкил дод. Ҳоло дар КВД “Почтаи Тоҷикистон” 4 корхонаи фаръӣ, 63 Маркази “Почтаи Тоҷикистон” дар шаҳру ноҳияҳо ва 470 шуъбаи почта фаъолият доранд. Маъракаи обуна ва бурда расонидани матбуоти даврӣ аз бахшҳои умдаи фаъолият ва самти даромадноки КВД “Почтаи Тоҷикистон” ба ҳисоб меравад. Дар ин самт маъмурияти корхона ҳамкории барои тарафҳо судмандро бо идораи рӯзномаю маҷаллаҳо ва Мақомоти иҷроияи Ҳокимияти давлатии шаҳру ноҳияҳо ба роҳ мондааст. Танҳо дар соли 2025 32 миллиону 388 ҳазору 631 нусха рӯзномаю маҷаллаҳо ба обуначиён бурда расонида шуд. Ҳаҷми бори кашондашуда зиёда аз 185 тоннаро ташкил медиҳад, ки нисбат ба соли 2024 58 тонна зиёд мебошад. Пешвои миллат, Президенти Ҷумҳурии Тоҷикистон дар Паёми имсолаи худ ба Маҷлиси Олӣ бахшида ба таҷлили ҷашни 35 солагии Истиқлоли давлатии Ҷумҳурии Тоҷикистон соли 2026-ро “Соли вусъат додани корҳои ободониву созандагӣ ва тақвияту таҳкими худшиносию худогоҳии миллӣ” эълон намуданд. Аз ин рӯ, мо тасмим гирифтаем, ки дар баробари ҷорӣ кардани технологияи муосири хидматрасонии почта, боз ҳам боло бурдани сифати хидматрасонӣ, ҳамзамон корҳои ободонию созандагиро дар тамоми бахшҳои корхона ба роҳ монда, дар сарсабзии кишвари азизамон саҳми боризи худро гузорем. Сайдалӣ МИРЗОЗОДА Директори генералии КВД “Почтаи Тоҷикистон” Бознашр аз маҷаллаи “Алоқа” январ 2026 /№1
НАШРИ НАХУСТШУМОРАИ МАҶАЛЛАИ «АЛОҚА»
Тавре иттилоъ доред, бо таҷдиди низоми сохтории Хадамоти алоқаи назди Ҳукумати Ҷумҳурии Тоҷикистон Муассисаи давлатии “Маҷаллаи Алоқа” ба фаъолияти хеш оғоз намуд, ки таҳия ва нашри маҷаллаи “Алоқа” яке аз самтҳои умдаи фаъолияти он мебошад. Маҷаллаи “Алоқа” нашрияи расмии Хадамоти алоқаи назди Ҳукумати Ҷумҳурии Тоҷикистон буда, бо мақсади инъикоси масъалаҳои муҳимми рушди соҳаи алоқа, раванди рақамикунонӣ, навовариҳо, таҳлилҳои касбӣ, фаъолияти зерсохторҳо, фаъолияти ширкатҳои мобилӣ, интернет-провайдерҳо ва дигар масоили муҳимми рӯз таъсис ёфтааст. Инак, дар оғози соли нави 2026 шумораи нахустини нашрияи мавриди назар бо теъдоди 1000 нусха ва бо сифати баланд ба нашр расид, ки ин падидаро ба кулли хонандагон, ба хосса кормандони соҳаи алоқа сидқан табрик мегӯем. Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ “Дар бораи самтҳои асосии сиёсати дохилӣ ва хориҷии ҷумҳурӣ” ва мавзуъҳои “Рисолати хадамот – хидмат ба халқ”, “Хадамоти алоқа дар низоми нав”, “Дирӯзу имрӯзи почтаи тоҷик”, “Тоҷиктелеком – оператори миллӣ”, “ORIZ – нахустмессенҷери миллӣ”, “Душанбе – шаҳри ҳушманд”, “Шаҳри ҳушманд ва имкониятҳои он”, “5G ва тафовути асосии он аз 4G”, “Нақши рақамикунонии сайёҳӣ”, “Аз таърихи алоқа”, “Ҷавонон – ҳамқадами замон”, “Сада – ҷашни чиллаи хуршед, яъне ғалабаи рӯшноӣ бар торикӣ” ва хабару гузоришу маълумотҳои ҷолиб муҳтавои умдаи шумораи якуми маҷалларо ташкил медиҳад. Ба хотири гуногунрангӣ ва хубтару ҷолибтар гардидани муҳтавои нашрия ҳайати эҷодии маҷалла мутахассисони варзидаи соҳаи алоқа, олимону донишмандон, аҳли адаб ва муҳаққиқону пажӯҳишгаронро ба ҳамкорӣ даъват менамояд.
Дар Хадамоти алоқа нишасти матбуотӣ оид ба ҷамъбасти фаъолияти соли 2025 баргузор гардид
28 январи соли 2026 дар бинои Хадамоти алоқаи назди Ҳукумати Ҷумҳурии Тоҷикистон нишасти матбуотӣ оид ба ҷамъбасти фаъолияти соҳа дар соли 2025 баргузор гардид. Дар нишаст Роҳбарият, сардорони раёсатҳо ва зерсохторҳои Хадамоти алоқа, намояндаи Дастгоҳи иҷроияи Президенти Ҷумҳурии Тоҷикистон, роҳбарони аввали ширкатҳои мобилӣ ва беш аз 50 намояндаи ВАО иштирок намуданд. Сардори Хадамоти аалоқа Исфандиёри Саъдулло аз натиҷаҳои асосии фаъолияти соҳа, иҷрои барномаҳои давлатӣ, ҷорӣ намудани лоиҳаҳои рақамисозӣ ва тақвияти ҳамкорӣ бо ширкатҳои алоқаи дохиливу хориҷӣ иттилоъ дод. Таъкид гардид, ки дар соли 2025 Хадамоти алоқа ҷиҳати рушди инфрасохтори соҳаи алоқа, баланд бардоштани сатҳи хизматрасониҳои телекоммуникатсионӣ, густариши интернет, беҳтар намудани сифати иртиботи мобилӣ ва татбиқи технологияҳои муосир тадбирҳои муҳим амалӣ намуд. Зимни нишасти матуботӣ аз ҷониби рӯзноманигорон беш аз 30 савол пешниҳод гардида, Сардори Хадамоти алоқа ба саволҳои намояндагони воситаҳои ахбори омма посух гуфт. Дар ҷараёни нишаст намояндагони ВАО вобаста ба масъалаҳои марбут ба нархи хизматрасониҳо, сифати интернет, фарогирии шабакаҳои мобилӣ дар минтақаҳо, истифодаи технологияҳои нав ва нақшаҳои минбаъдаи Хадамоти алоқа саволҳо пешниҳод намуданд, ки ба ҳамаи онҳо посухҳои муфассал дода шуданд. Дар фарҷом таъкид шуд, ки Хадамоти алоқа минбаъд низ ҷиҳати баланд бардоштани сатҳи хизматрасонӣ, дастрасии бештари аҳолӣ ба интернети босифат ва рушди устувори соҳа чораҳои иловагӣ меандешад.
Маҷлиси ташкилоти ибтидоии ҳизбии “Ориз” ва шарҳу тавзеҳи нуктаҳои Паёми Пешвои миллат
Дар Хадамоти алоқа Маҷлиси ҷамъбастии ташкилоти ибтидоии ҳизбии «Ориз»-и Ҳизби Халқии Демократии Тоҷикистон баргузор гардид, ки дар он натиҷаҳои фаъолияти солона мавриди баррасӣ қарор гирифта, ҳамзамон нуктаҳои асосии Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон аз 16 декабри соли 2025 шарҳу тавзеҳ дода шуданд. Дар ҷараёни маҷлис таъкид гардид, ки аъзоёни ташкилоти ибтидоии ҳизбии «Ориз» дар давраи ҳисоботӣ дар баробари дигар аъзоёни Ҳизби Халқии Демократии Тоҷикистон дар маъракаҳои муҳими сиёсӣ ва иҷтимоии кишвар иштироки фаъолона дошта, ҷиҳати татбиқи ҳадафу барномаҳои ҳизб саҳми назаррас гузоштаанд. Фаъолияти онҳо пеш аз ҳама ба тақвияти корҳои таблиғотию ташвиқотӣ, баланд бардоштани маърифати сиёсӣ ва таҳкими мавқеи ҳизб дар байни кормандони соҳа равона гардидааст. Муовини раиси ташкилоти ибтидоии ҳизбии «Ориз» Нориён Парвиз зимни пешниҳоди ҳисоботи солона аз натиҷаҳои фаъолияти дохилиҳизбӣ, иштироки аъзоён дар чорабиниҳои сиёсӣ ва иҷрои уҳдадориҳои оинномавӣ ёдовар шуд. Ӯ зикр намуд, ки бо мақсади мутобиқ намудани фаъолияти ташкилоти ибтидоӣ ба талаботи Оиннома ва Низомномаи ҲХДТ, инчунин такмили ҳуҷҷатгузорӣ, супоридани ҳаққи узвият ва ба қайдгирии мунтазами он дар шаҳодатномаҳои ҳизбӣ тадбирҳои амалӣ андешида шуданд. Дар идомаи суханронӣ таъкид гардид, ки таъсиси гурӯҳи корӣ аз ҳисоби кормандони Кумитаи иҷроияи ноҳиявии ҳизб иқдоми саривақтӣ буда, он барои баланд бардоштани сатҳи интизоми ҳизбӣ, танзими ҳаракати аъзоён ва расонидани ёрии методӣ нақши муассир бозид. Дар натиҷаи ҳамкории мутақобила байни гуруҳи корӣ ва масъулини ҳизбии ташкилоти ибтидоии «Ориз» фаъолияти дохилиҳизбӣ шакли муназзам ва ҳадафманд касб намуд. Убайдулло Қурбонзода, раиси Кумитаи иҷроияи Ҳизби Халқии Демократии Тоҷикистон дар ноҳияи Исмоили Сомонӣ, дар баромади худ ба муҳтавои Паёми Пешвои миллат таваҷҷуҳи хос зоҳир намуда, онро ҳамчун ҳуҷҷати муҳимми сиёсиву стратегӣ барои рушди минбаъдаи кишвар арзёбӣ кард. Ӯ зикр намуд, ки дар Паём самтҳои асосии сиёсати дохилию хориҷӣ, рушди иқтисоди миллӣ, таҳкими амнияти давлатӣ ва баланд бардоштани сатҳи зиндагии аҳолӣ ба таври возеҳ муайян шудаанд. Номбурда ҳамчунин ба вазъи мураккаби ҷаҳони муосир ишора намуда, таъкид кард, ки дар чунин шароит шинохти дурусти манфиатҳои миллӣ, таҳкими зиракии сиёсӣ ва ҳисси баланди масъулиятшиносӣ вазифаи ҳар як шаҳрванди худогоҳ, бахусус аъзои ҳизб мебошад. Ба гуфтаи ӯ, аъзои ҲХДТ бояд дар татбиқи сиёсати созандаи Пешвои миллат фаъолона саҳм гузошта, бо амалҳои худ намунаи ибрат бошанд. Сармуҳаррири Муассисаи давлатии «Маҷаллаи алоқа» Икромӣ Сироҷиддин Икром низ зимни баромади худ нуктаҳои Паёми Пешвои миллатро шарҳ дода, дастовардҳои таърихии Ҷумҳурии Тоҷикистонро дар соли 2025 мавриди таҳлил қарор дод. Ӯ таъкид намуд, ки муваффақиятҳои бадастомада самараи сиёсати хирадмандона ва дурандешонаи Президенти кишвар буда, Паём ҳамчун роҳнамои амал барои тамоми соҳаҳо, аз ҷумла соҳаи алоқа, хизмат мекунад. Дар фарҷоми маҷлис иштирокчиён иброз доштанд, ки мазмуну муҳтавои Паёми Пешвои миллат онҳоро ба фаъолияти боз ҳам самаранок, тақвияти корҳои дохилиҳизбӣ ва саҳмгузории бештар дар рушди устувори кишвар раҳнамун месозад. Қарор дода шуд, ки минбаъд низ аъзоёни ташкилоти ибтидоии ҳизбии «Ориз» дар татбиқи ҳадафҳои стратегии давлат ва ҳизб фаъолона иштирок намоянд.
Ёддошти тафоҳум оид ба рушди телекоммуникатсия ба имзо расид
Дар Хадамоти алоқаи назди Ҳукумати Ҷумҳурии Тоҷикистон маросими имзои Ёддошти тафоҳум оид ба ҳамкорӣ дар рушди иттилоотикунонӣ (информатизатсия) байни Хадамоти алоқаи назди Ҳукумати Ҷумҳурии Тоҷикистон ва Ширкати Jinda Anbang (Beijing) Technology Development Co., Ltd. баргузор гардид. Ёддошти тафоҳум аз тарафи Сардори Хадамоти алоқаи назди Ҳукумати Ҷумҳурии Тоҷикистон Исфандиёри Садулло ва Раиси Шӯрои директорони Jinda Anbang (Beijing) Technology Development Co., Ltd. Ҳан Сяохан ба имзо расониданд. Санади мазкур ҳамчун замина барои баррасӣ ва ба роҳ мондани ҳамкориҳои мутақобилан судманди ҷонибҳо дар соҳаи технологияҳои иттилоотӣ ва коммуникатсионӣ, навсозии инфрасохтори рақамӣ ва пешбурди иқтисоди рақамӣ дар Ҷумҳурии Тоҷикистон равона гардидааст. Ёддошти тафоҳум дар доираи шарикии стратегии ҳамаҷониба байни Ҷумҳурии Тоҷикистон ва Ҷумҳурии Мардумии Чин дар марҳилаи нави рушд ба имзо расида, ба ҳадафҳои Стратегияи миллии рушди Ҷумҳурии Тоҷикистон то соли 2030, инчунин ташаббуси байналмилалии «Як камарбанд – як роҳ» мутобиқат мекунад.